top of page

WOCHE 1 - 15. JULI BIS 22. JULI 2024

Autorenbild: EFiiEFii

Aktualisiert: 27. Aug. 2024

Üsi erschti Wuchä het chaotisch mit Flugverspätig und stornierter Hotelbuechig agfangä in New York. Trotz beeidruckende und aber o enttüschende Momentä, het d Fii i dere Stadt überraschenderwiis d Früüd am Velofahrä gfundä (JA, würklech iz!). Die endlos lengi Reis nach Memphis het üs unvorhärgsehnigi Herusforderigä bracht und speter de o Warnigä bis gfährlechi Situatione womer fasch drin glandet si - und ä unerwarteti Luscht uf Zigarettä. Ä ufregendä Start, wo üs scho früeh Vielfalt und Unberächäbarkit vo üserä Reis ufzeigt het! Viel Spass bim Läsä :)


15. JULI 2024

DI LEDSCHDÄ VORBERITIGÄ


Vom Mentig ufä Dsischtig, hi mier di ganz Nacht packt, d Wohnig usgmischtet, putzt, gwäschä und für üsi Airbnb Gescht vorberitet, wo üsi Wohnig für je 1 Monet wärdä bezieh. Beidi miteme totalä Schlafmanko, nüt richtigs im Magä u ifach ki Energie gha. So hi mir Schichtwis hurti äs Nücki gno. D Fii vom 21:00 - 23:00 u d Evä het vom 05:00 - 06:00 o no hurti ä „5 Minütigä“ Powernap gmacht. Obwohl mir üs vor jederä Reis vornähmä, dass es dasmal ki Stress wird gä u mir drus glernt hi, wüssä mir, dass es glich umi so wird cho u die wo üs besser kennä überraschts o ned :) Das si mier und z positive isch, dass es trotzdäm irgendwie immer funktioniert.


16. JULI 2024

HIREIS


Öppä am 07:15 si mier duä losgfahrä für zur Fii id Budä, wo mir ihres Outo si ga iquartiere und no versuecht hi z Check-in fürä Flug z machä. D App het ned funktioniert, d Websitä nid u de het d Fii dr Laptop no fürägno fürs ä so z probiere. Nägschts Problem: Laptop kaputt!

Dr Laptop wo sie äxtra nomal frisch ufgsetzt het ka für d Reis. Da het üses IT-Girl hurti d Skills uspackt, irgend es schwarzes komisches Fenschter ufta und mit paar Befählä das Züg gflickt. Trotzdäm isch z Check-in ned gangä u dEvä isch liecht i Stress cho. Also hi mir ki anderi Wahl gha als de halt am Flughafä z gugä. Churz nach dä 8ä si üsi liebi Nicole und dr Ayden (Fii‘s Gottäbueb) itroffä und hi üs abgholt für a Flughafä z fahrä. U obwohl mir doch gnuä Zyt iberächnet hi, hets die liebi Chauffeurin älwä chli z guet gmint mit üs und am Blitzer begägnet. Bis uf das und äs bizi Stou bir Verzweigig Züri / Winterthur hi mier ä sehr agnähmi u sicheri Fahrt dörfä ha - Danke vil mal liebi Nicole fürs häräbringä❤️


FLUGHAFÄ


Churz nach dä 10:00 si mier acho und z Check-in ga machä. Da het d Fii doch tatsächlech no d Powerbank usem Gepäck müessä grabä u is Handgepäck duä will das verbotä isch. DFii hets ar Evä denn ned wellä gloubä u denkt so giz gäbiger als dä Chlotz im Rucksack z ha. Chum simer vom Schalter wäg, het dFii stolz grinst „I ha no meh elektrisches im Gepäck, aber äs het mi iz ifach agschissä das o no us z packä“. Üsi Informatikerin het älwä ned verschtandä, dass das ned ganz ungfährlech isch… tja.

Dernach isch d Fii no uf d Bank ga Finanzä reglä u d Evä mitem Ayden u dr Nicole äs Kaffi ga näh. U de hi mier üs o scho müessä verabschiedä vo ihnä 2. Nach dr Security si mier no öpis ga Zmorgä, Zmittag u Znacht (vom Vorabä) ga ässä u zu üsem Gate. D Evä isch am umänärvöselä xi u het angscht gha z Gate dued zue (über 1h vor Abflug…?!) d Fii hez chilliger gno u uf di risigi Wartäschlangä verwisä wo alli scho am schtah si xi, für was wiss d Fii ned. D Evä wer aber o am liebschdä ga häräschtah usem Grund „De chöne mier ender hockä“…genau dä Gedankä het d Fii zwar o gha aber anders. D Fii hockt lieber lang am Gate u schtit de uf wes no so 5 Lüt ir Schlangä het, de ischme mischtens schnäller im Flüger u cha dört o zimli schnäll abhockä, logisch nid? Üsi Bachelor Absolventin findets effizienter lang azschtah, mit allnä glichzitig iz Flugi z quetschä u när irgendwenn z hockä. Für alli wo no niä si gflogä.. loset uf d Fii :) da isch dEvä aber angerer Meinig. Sie isch nämlech no ini vo dä 20 Glückspilzä xi wo gscannt u untersuecht isch wordä u wer dahär lieber früeh los. O hie denkt d Fii, dass dr Flüger glich ned ehnder flügt u mä nid ehnder im Flugi sitzt. Aber merket öich, we dir 4x SSSS ufem Ticket vermerkt heit, de heit lieber kes wiisses Nasepuder drbi ;)


ABFLUG


So oder so.. im Flüger himer definitiv lang chönä hockä, da mier zimli genau 1h Verspetig hi gha. Wieso wüssä mir ned aber halb so schlimm, mier hockä drin und hi alls pünktlech gschafft. Im Flugi hi mier ä Zweier Platz u niemer hinder dran, was sehr cool isch! Was ned so cool isch, dr Schreihals wo ä Reihä witer links vo üs hockt u ned Flugangscht het, sondern ifach dr Tarif dürägit! Äs richtigs New Yorker City Girlie älwä? Mier schetzä sä ca. 2 Jehrig ih und werä öpis ned passt (was sich ir Minutä so um die 2-3x ereignet) schreit si, schleht d Muetter und d Gschwüschterti. Zum Glück si mier beidi usgstattet mit Noise Cancelling Chopfhörer u chömä so oder so zu Schlaf. Dä mitem Schlaf het bir Evä besser klappt als bir Fii, wo dr Schlaf immer no ned findet. Äs isch i däm Flüger aber o trotz Dechinä u kuschlä verdammt Chalt xi. Mier hi halt o ned so Energie ka u si due froh xi, wo z Ässä isch bracht wordä. Mier hi äs feins Zmittag becho: Basilikum-Pesto Chicken-Gnocchi mit Spinet, Gugus Salat, chli Chees mit Knäckis UND amnä Tiramisu! D Fii het klari Prioritä gsetzt u als erschts natürlech z Tiramisu gässä :D Das verwunderet öppä niemer, wo üses Schläckmüli kennt. Vor luter Euphorie wie fein das isch xi (besser als i gwüssne Italiener Restis) het si ar Evä gad chli vom Gugus Salat aglöst (uf Dütsch: usglehrt). Speter het d Evä derfür d Fii mitem Wasser duschet. Mier 2 Tollpätsch föh üsi Reis scho guet ah.

Speter wo mier es feins „Bolognese-Calzone“ hi übercho, ischs witer gangä u d Fii hets irgendwie gschafft, z ganzä Salzpäckli überem Sitz und Tisch z vertilä - Bravo a därä Stell! Im grosse u ganzä isch dr Flug sehr agnähm verloffä, obschons ganz liechti Turbulenzä het ka. Was aber hie no z erwähnä gilt u häbet öich fescht: D Fii het uf däm Flug z erschtä Mal i ihrem Läbä „König der Löwen“ guget. O hie äs Bravo a därä Stell! Sie cha aber ned nachävollzieh werum mä ihrä immer gsit het, dasses äs Skandal isch dä ned gseh z ha. Us Eväs Sicht ä klari Bildigslückä! Speter hez ar Fii zwar ned wellä schlafä, aber chli dösä het si chönä u wo d Evä ufgwachet isch u zur Fii guget het, het sie z Gfüehl ka ä Küdersack hockt näb ihrä. D Fii het sich ipackt u me het no gad knapp dr Nasespitz gseh. Sie het sich aber so fescht zuegschnüert, dass üsä Tollpatsch sich nem het chöne entchnüpplä u us däm Küdersack schlüfä, d Evä isch zur Hilf cho. D Landig isch sehr idrücklech xi, willmä d Skyline het gseh, zwar ned guet aber me het scho ä erschtä Idruck becho wie riesig d Stadt muess si!


16. JULI 2024

WELCOME TO THE STATES!


Chum glandet, surprise: 30-45 Minutä wartä bis mir zum Gate chönä fahrä. Z positivä: üsä chli Schreihals von Nebenan isch igschlafä! Iz sis due 1.5h xi womer gwartet hi. 1h u 15 min agstande für d Immigration u die isch 3-4 min gange aber är het gar ke Bock ka. U d Evä isch natürlich umi verdächtig ufgfallä u het müesse Fingerabdrück u alles gäh! D Fii isch das mal sogar für Ü16 ghaltä wordä u het o ini dörfä! Da alls so lang isch gangä, hi ned mier uf z Gepäck gwartet sondern z Gepäck uf üs. Nachdäm mir ufe Zug si, hi mir umi chli öpis vor Skyline gseh und di erschti NYC-Abäsunnä wo würklech imme füürrote Liecht glüchtet und e rosaroti Szenä id Skyline zouberet het. Im Vordergrund si mir beschenkt wordä mitere coolä Sicht uf die typischä Vorstadt Hüsli und es het usgseh, wimes kennt vodä Filmä. Mitem Zug isches bis zur Station gange, wo när die verschidene Züg & Subways fahrä. Für üs isches also vom Flughafä zur „Jamaica“ Station gangä u vo dört himer d Subway gno richtig Stadt für i üses Hotel am Times Square. Das „werä“ ungefähr 1.5h Fahrtzyt xi bis zur Station „50 St“. Ir Subway hi mier scho richtigs New York Feeling übercho: Lüt, wo ihres Znachtässä mit dr Familiä hi ir Subway abghaltä oder sörigi, wo mit ihrer Schildchrot ufem Schoss am Gassi gah si. Ä Typ wo oben ohne isch am sini Buchhaar uspickä u ässä xi. Äs het o ä potenzielle Schreihals 2.0 ka, aber da het due d „Mom“ gad dr Tarif düri gäh u lut gsit „Shut up! SHUT UP!!!!“ u somit isch das erledigt xi. Derzue himer die verschiedenschte Musiggschmäcker kennäglernt will hie jedä lut ufem Handy oder dä Boxä sini Musig bringt ir Subway. Welcome to New York! Und nomal ä Unterbruch, will nach meh als 1h fahrä het d Subway d Kontrollä verlorä u de hi mir 3 Statione vorhär müesse usstige und üs ohni Internet mitem Subway Netz vor NYC bekanntmachä zum irgendwie i das Hotäl z cho. Nach witerä 3x umstiege und no 5 Minutä dürä Times Square spazierä, wo üs schomal d Müler het la offe ha, hi mir de ds Hotel gfundä.


HOTEL CHECK-IN NEW YORK CITY


Am 22:15 si mir dört acho, Yes! Endlich icheckä, duschä u ab id Stadt - hi mier denkt. Sie hi üs aber ned im System gfunde. Är het gsuecht u gmacht öppä ä Viertelstund lang u äs het sich usigschtellt, dass üsi Buechig im April isch storniert wordä. Das himer nach sorä langä Ris no chönä bruchä :) Aber mier his easy gno u zum Glück o ä super Rezeptionist gha wo üs vorgschlagä het nomal 4 Nächt z bueche, dass mir chöne ga ligä und mier mit dr Migros (z Hotel hi mier über Migros Ferien buechet) am nägschtä Tag aluege, was passiert isch. Das hi mier gmacht, hi CHF 1'200.00 für 4 Nächt mit dr Kreditchartä reserviert u si is Zimmer. Dört himer gad es Mail ad Migros gschribä, ir Hoffnig sie mäldä sich i dä nägschtä Stund, zu dere Zyt isch ir Schwiiz öppä scho fasch 5i am Morgä xi.


MIER SI ACHO U HEI HUNGER


Hungrig u gspannt uf d Stadt, si mier no hurti usigangä u hi sofort üses Comeback fürä Taco Bell wellä ha. Dört si mier im 2018 viel xi u hi „Nacho Fries u Tacos“ verdrückt. Die Nacho Fries giz numä düre Summer u drum isch das z erschtä xi, wo mir langersehnt ir USA hi müesse machä! Näbscht däm sich d Fii no äs „Reeses“ original ir USA gönnt het. Im Taco Bell si mier diräkt nostalgisch wordä und hi scho angscht ka, äs git sä nem. Aber dr Taco Bell het üs no nie im Stich glah und so hi mier nach 6 Jahr endlech umi die Nacho Fries zwüschä d Backä becho. Mier hi o no je 2 Tacos ka u si diräkt zrug versetzt wordä und hi dört d Nacht la usklingä (wi mier am nägschtä Tag erfahrä hi: Ar Evä ihri Schwo kennt üs natürlech u het genau gwüsst, dass mier i däm Taco Bell landä. Usem Gluscht usä hei sie sich när gad Tacos bstellt). När simer zrug iz Hotel u d Evä isch diräkt iz Bett kiit u innert Sekundä wäg trättä. D Fii het sich o Bettready gmacht und isch när o is Bett.


Mier si z BÄRN Dahimä am 07:15 usem Huus u am 22:15 zu NYC Zyt im Hotel acho. Das hisst mier si insgesamt 20 Stund am Reisä xi u vorhär no d Nacht dürägmacht etc. Das isch fang üsi Hiris u Akunft xi, jitz giz richtig los!




 

17. JULI 2024

DAY 1 - NEW YORK CITY, NEW YORK


Hüt Morgä isch d Evä scho öpis vor dä 8ä ufgwacht, d Fii ersch vor dä 9ä (wimesä kennt). Nachere Duschi hi mir üs parat gmacht, NYC ga z erkundä. D Migros het üs scho zruggschribä u somit isch für z Hotel jitz o gsorget. Willmä öppä 10-15 Minutä ufä Lift wartet, si mier duä d Stägä achigloffä was übrigens sehr idrücklech isch xi, wills üs a actionriichi szenenä us dä Filmä erinneret het. Mier si öppä am halbi 11 ifach druflos gloffä u hi fürnes passends Resti usschou ghaltä. Was bi üs 2 aber natürlech nie darf fehlä isch äs guets Kaffi am Morgä. Per Zuefall het sich das im „Blank street coffee“ gfundä und mier si gsattlet xi fürä Tag. D Fii het unbedingt no iz „Planet Fitness“ wellä ga gugä fürnes Fitness Abi z lösä u de si mier das no ga abklärä, aber leider isch das alls chli komplizierter xi als denkt u under „Worldwide Studio Access“ verschtöh d Amis öpis anders als mier hi denkt, nämlech maximal 10 Mal und numä in New York City. Mier sueche hie es anders Mal ä Lösig will mier hungrig si u d Evä süsch zur Diva wird u d Fii i Angscht müesst läbä. Ga ässä si mier iz „Sweetgreen“ u hi üs äs mega feins „caramelized garlic steak organic“ mit riis und gmües als bowl tilt. Mier his beidi sehr fein gfundä us gärn ka. Das het üs öppä 21$ gchostet ohni Trinkgäld. Nachem ässä hi mier äs churzes Pöiseli gmacht. Vo was? Das wüssemer o nid will mier hi bis dahärä no nid viel gmacht, aber äs isch sehr hiss z New York und das macht in Kombi mitem umälufä ifach müed. Mier hi usserdäm zerscht mal ä Cyber Truck gseh uf dr Strass u d Evä hez mega cool gfundä aber ned tscheggt, dasses ä Cyber Truck isch bzw. dasses dä git.

Am 12:30 si mier duä witer richtig Central Park gloffä u hi im Shopping Center näbedran „Columbus Circle“ ä Ladä gseh, wo sich d Fii nüiji Joggingschueh het wellä chufä. Äs het ä Statue gha wo d Fii als Hintergrund brucht het fürnes Foto vor Evä mit Aleitig wie posiere. D Evä het nid tschegget was die bestimmti Posä söll bis sie sich speter umdreid het und het gmint, dass d Fii numä Seich im Grind het. Öppe uf die 12:45 het d Fii im Ladä dr erscht Schueh probiert, wo d Evä als Physio ihre und ihrem „Runner‘s knee“ empfohlä het u d Fii isch begeisterer xi vo däm Schueh wie agnähm u bequem dä isch! Obwohl sie gad ke anderä meh het wellä aprobierä, hi mier de glich no ä halbstündigi Beratig gmacht u d Evä het klar d Funktion vom Schueh i Fokus gsetzt, anders als ar Fii. Für sie het dr Schueh natürlech „grau“ müesse si (was o süsch?!) und sä vom Design asprächä, da isch gad ä chli d Fashionqueen i ihrä füricho. Sie het due sälber o gmerkt, dass die vo ihre Userwähltä graue Schueh ifach für ihre Körper ned wärdä funktioniere u het dä Schueh kuft, wo sie als erschts probiert het. Dä isch türkis und findet sie farblech o schön, immerhin! Am 13:30 isches endlech witergangä i Central Park, dä isch numä gad über dr Strass xi. Für je 25$ hi mier 2 Velos gmietet (JA, d Fii isch VELO gfahrä!) u hi bewusst vore Versicherig für d Velos abgseh. Grund derfür isch folgendä: We z Velo gstohlä wer wordä, hetä mier ifach o eis gstohlä u hettä das zrug bracht. D Fahrt dürä Park isch so öpis vo unglublech xi! Allgemein isch dä Park üses bishärigä Highlight (hi ja o scho so vil Uswahl hehe) willmä ifach a jedem Eggä umi öpis z entdeckä het u hurti aghaltä isch für ga z gugä oder Fötelä. Vo verschiedenä Sportplätz, Spielplätz, Picknick Möglechkitä, igeti Pärk, riesigi Wiesenä, Ehöreni, Vögel, Zoo, Wasserfäll u Bäch usw. bis hin zurä igetä Huptstrass fürä Park (ned füre allgemein Verchehr) wome als Velofahrer, Jogger, Rollerblades, Outo usw. het chöne bruchä, hez ifach alls ka! Derzwüschä het o ging umi irgendwelchi Stend gha für Getränk, Glacä, Hot Dog‘s oder Frücht. Was de absolut Wahnsinn isch xi u vor allem d Fii us dä Sockä ghouä het, isch dr See im Park xi! Äs het zwar mehreri Seeä im Central Park aber dä isch nach ihrer Vorstellig gfüehlt öppe so gross wi dr Thunersee! Hindedran hetmä no paar Wulchächratzer gse und äs isch unglublech was das für Dimensione si i därä Stadt! Äs isch witer gangä mit üserä „chilligä“ Velotour, wo d Evä überhupt ned wie vo ihrä gwünscht isch gmüetlech xi, sondern meh äs Workout will d Fii zimli zackig underwägs isch xi ufem Velo und o richtig mal het wellä uskoschtä inä vo dänä „Idiote-Velofahrer“ z si u de isch sie mit Gnuss über jedi roti Amplä gfahrä (Ja äs isch wük winä Huptstrass). Öppä ir Hälfti vom Usfährti het d Fii gmerkt, dass d Evä Müeh het bim schaltä u ihrä scho dr Dumä wehtuet dervo. U churz vor Schluss het d Evä de o dr Sattel mal chli höijer gstellt u gäbiger chönä fahrä. D Fii het gmint, dass d Evä ufgrund vo ihrer Höheangscht dr Sattel so tüüf igstellt het. So sie die ledschdä Minutä no gmüetlech usgfallä u nach nid ganz 2h hi mier d Velos umi zrug gäh. Da hi när afa is äs paar Vitaminä härämüessä u so hi mier 2 Smoothies kuft u si nomal i Park gloffä u chli uf d Wiesä ga ligä u sünnelä. Ä Platz gad undermä wunderschönä Bum ire ruhige Umgäbig, wo mier hurti ä Halbstund erholt hi. Gstercht isches witergangä uf d Suechi nach Sneakers für d Evä. New York het am Abä Rägä u Gwitter gmuldä u da het d Evä chli wasserdichteri Schueh wellä ha. Die erschti Alufstell isch dr „TJ Maxx“ xi, wo aber eher ä allgemeine Store wi dr Target isch xi. Also simer witer u underwägs het sich d Fii ned la entgah ä „NYC Hotdog“ z ässä u wenigi Minutä speter hi mier dr Food Market (Urban Space) entdeckt u si dört o nomal ga ässä. O wes ned gross isch xi hez dört verschiedenschti Stend ka mit Ässä us aller Wält. D Evä het scho sitem vorhärig Tag gluscht uf Indisch u het äs Palak Paneer bstellt, d Fii Butter Chicken. Leider isches für d Evä chli ä Reinfall xi wills ihre ned gschmeckt het u o vil z scharf isch xi. Z Butter Chicken isch easy xi u d Fii het das när mit dr Evä tilt. Den si mier umi witer uf d Sneakers Suechi u si i Puma store, Nike Store, Adidas Store und i JD Store. Niene hets öpis passends gä und drum hi mier d Suechi verschobä ufene anderä Tag. Mier si gad ir Nechi xi vom „Bryant Park“ u due dört chli ga verwilä. Dä isch o ä sehr coolä Park ir Stadt wome jedä Tag verschiedeni Events, Attraktione und Möglechkitä het. Är isch überhupt ned gross (vlich wie di chlini Schanzä z Bärn) aber wük ä sehr charmevolle Park zmit ir Stadt. Im Summer giz hie o viel Live Konzärt oder Filmnächt, wo aber gad ä Tag vorhär weri xi. Am Morgä giz mischtens gratis Yoga, Thai Chi u anderi Kürs wome cha machä. D Fii würd gärn am 21:00 i Bachata Kurs u drum si mier richtig Hotel zrug. Für d Evä isches kritisch wordä u het nomal äs Kaffi brucht. Lang hi mier Usschou ghaltä nacherä Rösteri aber äs het gad nüt umägha u drum isches äs Kaffi usem Starbucks wordä, s het söllä si Zwäck erfüllä. Am 20:15 simer im Hotel xi u leider hez jitz nem glängt füre Bachata Kurs u drum isch im Hotel ifach Platz xi für d Evä zum nappä u d Fii isch under d Duschi für när a Bachata Social (Bachata only Usgang für Bachata Tänzer:Inne). Öppe am 22:15 si mier los dürä Rägä für zur Subway. Öppä am 23:00 si mier am Zielort acho: ä Rooftop Bar mit diräkter Sicht uf z Empire State Building - Hammer! Leider isch dr Bodä u die mischtä Lüt hie ned halb so dr hammer wie d Sicht gsy! Mier si churz vor dä 00:30 gangä u himglofe. Ar Fii isch ufgfallä wie sicher New York isch u kis Problem wer ellei um die Zyt himzlufä u het gmint das isch für Evä o so, genau i däm Moment wo sie das ihre verzellt, gumped ä Rattä usem Küder zur Evä u sie schreit luthals los u d Frou hinder üs nimmt o gad ä Gump. Das isch witzig xi, emel für d Fii. Was weniger witzig für sie isch xi, die ganzä Obdachlosä a fasch jedem Eggä. Das het sä rächt beschäftigt und bire Beckeri isch ä volle Küdersack xi mit so viel Gebäck drin wo fuetgschossä isch wordä u 2 Lüt si das alls am usäfischä xi zum ässä. O das isch New York und ghört leider derzue. Scho gli simer när im Hotel xi öppe am 01:15 und hi miterä guetä Müedigkit iz Bett chönä.


Üses hütigs Highlight: Velofahrä im Central Park (isch sogar ou ar Fii ihres Highlight)




18. JULI 2024

DAY 2 - NEW YORK CITY, NEW YORK


Hüt isch d Fii ehnder ufgwacht als d Evä. Am halbi 8i u das ohni Wecker. D Evä het ä Stund speter fang d Ugä uf becho u gmeinsam hi mier chli guget was hüt öppä so dr Plan wird. Dernach ab under d Duschi u am 10:15 ischs los ganzä. Natürlech isch äs guez Kaffi umi a erschter Stell gstandä. Das himer dasmal im „Four Five Coffee“ gholt u si zrug ufä Times Square spaziert wo mier miteme „Big Bus“ Agent überä Priis fürä „Hop-on-off" Bus hi verhandlet. Nach vielem Hi und Här und üs nachelufä, hi mier üs ufnä Priis geinigt wo zwar glich no tüür isch xi aber dr Omar (so heter ghissä) glich ned het müessä Hunger liidä u Krach mitem Boss bechunt. Hie ischs üs usserdäm mal z guet cho, dass üses Babyface looking Fii nid numä usgseht wi unter 16i sondern o dr Chinder Ticketpriis het chöne zahlä. Öppis vor dä halbä 12 simer los uf d Downtown Tour. D Audiotourstimm het ane Folg vo „Paw Patrol“ erinneret. Die erschtä Stopps hi mier übersprungä will mier die scho relativ guet z Fuess hi chönä abklapperä. Därum simer bis uf „Little Italy“ gfahrä wo mier öppä uf di 12i usgstigä si u diräkt mitem Duft vor Italienische Chuchi si i Begägnig cho. D Fii het i däm Moment gsit „Mhhh dä Gruch hani mega gärn!“, sie het aber ned ds Ässä gmint sondern D Boumaterialie vore Buschtell. Churz druf isch sie inä Souvenir Shop gsecklet, als gäbgs kes Morn. Äs het sich usägstellt, dass i däm Ladä ä Bachata Song gloffä isch u sie dört chli isch ga losä. Dr Verchüfer isch enttüscht xi, dass dr inzigscht Gast i däm Ladä für d Musig isch cho u ned für z shoppä. Uf di 12:30 hi mier üs im Restaurant „Casa d‘Angelo“ niederglah u mässig fein Zmittag gässä. D Fii hez vorhär googlet u het gmint, das tönt super. Schlussendlech het sie sich aber o chli vo dä schön blauä Ugä vom Resti Lockvogel la inspiriere wo vorem Resti d Lüt ini holt. Äs isch aber es typisch amerikanisches italienisch xi. D Pasta si ned mal Al dente xi und meh Sauce als öpis anders. Ufnes Glesli Vino wi sichs ir italienischä Kulturso ghört, hi mier aber ufgrund vom Priis verzichtet. 1 Glesli het hie zwüschä 16 & 33 Dollar koschtet. Äs Bier het um die 10 Dollar koschtet. Mier hi aber dr Hunger chöne besitigä u si gstercht xi für Tag. Witer isches gangä am halbi 2 i däm mier no chli dür Little Italy gschlenderet si u no i nägscht District „Soho“ si cho. Soho het üs sehr gfallä wills ä Charme het gha wo üs diräkt a Portland (Oregon) erinneret het. Äs het überall cooli Lokal u härzigi Gässleni ka u isch verbundä xi miteme warmä Gfüehl. Dört hi mir o dr coolscht Ichufsladä gseh. Mier hi numä Wasser wellä ga chufä u si usem Stunä fasch nem usecho, wie suber u gordnet ä Ladä cha si. Usserdäm so vielsitig und me het dr Idruck becho, jedä ir USA ernährt sich gsund u jedä Öpfel wird handpoliert bevor är iz Regal darf. Z Gmües wie frisch usem Gartä, putzt u ghoblet ir Chüehli. När simer am 14:10 ufä Big Bus u bis zur Wall Street gfahrä, wo mir usi gjagt si wordä wägä Buuarbitä. Het nüt gmacht, will mier sowieso ir Nechi vor Whitehall si gsy u d Fähri hi chöne nä u nach State Island fahrä. Das isch wahnsinnig schön xi will mier bir Hifahrt uf d Brooklyn Bridge, Brooklyn u diversi Brüggene gseh hi. D Fahrt isch öppä 25 Minutä gangä u änä acho, hi mier ä churzä Ufenthalt ka u si när aber gad mit dr nägschtä Fähri umi zrug will mier no d Sicht uf d Friihitsstatue hi wellä gseh. Das isch üserä Minig nach zwar unspektakulärer xi als erwartet aber chamä glich mal machä. Viel meh het üs d Sicht uf New York City gfallä u zum stunä bracht. Das isch alls übrigens gratis xi u d Fii het das zum Glück gwüsst, will süsch hettä mier üs allefalls no Tickets la adräije. Rund um d Whitehall hez fasch all 10 Meter Lüt, wo wärbä mit Tickets für uf d Fähri. Nächhär si mier z Fuess zum 9/11 Memorial und Museum gschlenderet. D Gedänksstett und z Museum si sehr idrücklech xi aber irgendwie für üs beidi nid wük griffbar. Äs isch mega guet gmacht z Museum mit verschiedenschtä Erinnerigä, persönleche aber o historischä Artefaktä, wo si zum Teil restauriert hi (Boarding Pass vo dä Flugzügentfüehrer) u zum Teil ifach usgstellt hi wie Attentat vorgfunde (Füürwehrouto). Usserdäm hez die originalä Stalwänd und witeri Bouelement vo dä Gebäude im Undergrund ka. Mä het gmerkt wi dä Museumswärter wichtig isch, Respäkt vor dä Opfer und ihrne Aghörize bi z phaltä. A gwüssne Orte hetme bischpiilswis ned dörfä fötelä. Allgemein hetmä ned dörfä umäsecklä oder luut si. So hetmä gspürt, dasses ä Ort vore riesige Tragödie isch, wo mier üs gad befindä. Bis am 19:00 simer im Museum xi u gad knapp alls mögä schaffä bevors zueta het. Näbedran si mier üs umi mal äs Kaffi ga gönnä (Blue Bottle Coffee). Bis iz isch das dr beschd Kaffi xi in New York, willer üs under anderem o a Kaffi z Portland erinneret het. Per Zuefall simer witer gloffä zum Brookfield Place u si gflasht wordä vomnä abartig schönä Bild mitem Sunnäuntergang, Wasser und Jersey City Skyline im Hintergrund! Mier si üs sicher xi: hie wi mier Znacht ässä u no gmüetlech öpis trinkä. Zersch aber chli i Sunnäundergang am Wasser entlang spazierä. So simer due ufzmal bim „Rockefeller/Battery Park“ glandet. Dä Park isch o umgäh xi vo Wasser, Skyline u Sunneundergang. Derzue ä riesigi Wiese miterä Bühni ure Liveband! Familienä, Päärli, Fründä u Arbeitskollege etc. si aller versammlet uf derä Wiesä xi u hi mitenand dr Abä gnossä. Öppe aller hi ä Picknick Dechi ka inklusive Znacht. Mier si due o uf d Wiesä ga höcklä u his ifach gnossä. Was fürne wunderschönä, romantische u trumhaftä Moment in New York City! D Evä het hie übrigens zerschtä Mal i ihrem Läbä Glüehwürmli gseh! D Fii isch überzügt, dass si z Zwöit im 2018 o scho gseh hi.

D Fii het sich ä Wisswii gönnt u d Evä het da o gärn äs paar Schlückli gno. Äs het ifach gad alls passt u mier si ersch am halbi 10i witer. Da isch natürlech fischter xi u mier si am Pier entlang gloffä, immer no uf dr Suechi nacheme Restaurant. O ä unglublech schöni Ussicht bi Nacht! Da mier das ir Schwiiz ned hi, hi mier relativ lang dä Ablick gnossä u uf üs la würkä. Mier si bis zum „Pier 40“ entlang gangä u si derzwüsche no Zueschouer wordä vomnä Basketball Frizytsspiel under Locals dört. Äs het viel Agebot a däm Pier entlang für Sport z machä, vor allem Basketball aber o Tennis si guet verträttä dört. Mier hi ohni Plan ifach mal d Ugä offägha u üs isch um die 22:15 es mega härzig Resti chli im Verstecktä i z'Oug gstochä! Das het vo wiitem scho mit sim Charme gworbä u üs igladä. Äs het usserdäm nach öpisem usgseh, wo numä d locals si. Das findä mir immer die coolschtä Plätz! So richtigi Insider halt. Uf jedä Fall hettä mirs wük nid besser chöne brichä. Das isch nämlech z beschdä Ässä xi, wo mir je i üsem Läbä imne Resti hi übercho cho - das isch ke Übertribig sondern d Wahrhit. Mier hi beidi äs „Hanger Steak“ usgwählt u d Evä hets ir Zytlupä gässä, dasses ned so schnäll fertig isch. D Fii hingägä hez schnäll wellä gniessä. Mier si sehr guet bedient wordä u üse Chällner het sone ruhige u fründleche Idruck gmacht! Mier hi no äs Dessert gno u d Fii het gluscht ka ufnes Kaffi, für d Evä isches scho z spat xi. Churzerhand het sie sich aber umentschiede, „Yolo“ het sie gmint u sich o eis gönnt! Mier si mit 25% Trinkgäld us däm Ladä usä! Ir USA si 15-20% Trinkgäld ä unusgsprochni Pflicht. Wär also vor het uf New York z gah u sich das ned möcht la entgah (äs het o Vegi Sache) darf üs gärn kontaktiere fürnä ultimativ Gheimtipp, wo kener Touris am Start si. D Fii het no mit dä Agstelltä gredet u gfragt ob das eher sones Local Ding isch, däm hi si zuegstumme. Äs chöme viel us dr Nachbarschaft aber o anderi New Yorker Awohner:Inne. Öpis meh als 1.5h si mier zrug zum Hotel spaziert dürnes witers cools Quartier „West Village“! Äs het ä hennä cooli Architektur ka, viel typischi „New Yorker“ Hüser mit derä grossä Stägä vordran, überall isch öpis gloffä u mä isch umgäh xi vo Beizenä, ini cooler als die anderi! O wes guet bsuecht isch xi, isches ned luut xi oder überfüllt. Äs het sini Rueh ka i däm läbhaftä District. Sicher öpis wo dürä Tag wie o Nacht sehenswärt isch! Am 1 am Morgä si mier endlech zrug xi im Gallivant Hotel u iz Bett. Was fürne Tag das isch xi! So viel schöni Idrück wo mier hi dörfä sammlä. Üses bishärigä Highlight isch dr Sunneuntergang xi im Battery Park mit Liveband und gmüetlechem Parkfeeling.


Üses hütigs Highlight: Gmeinsam dr Sunneundergang im Rockefeller Park (Battery Park) z gseh, inkl. Skyline und Spaziergang am River